Taispeántas
Chun cuspóir daonlathach an tionscadail Eorpaigh a dhearbhú ar bhealach níos fearr, gheall an Pharlaimint go han-luath go ndéanfadh sí cearta an duine agus saoirsí bunúsacha a chosaint. I gcás na bhFeisirí, is streachailt uilíoch é an comhrac ar son na gceart sin. Bíonn siad ar na chéad daoine a chuireann in iúl go bhfuil imní orthu faoi sháruithe ar chearta an duine ar fud an domhain, beag beann ar na teorainneacha agus na réimis atá i bhfeidhm.
Ar an gcaoi sin, chosain siad saoirse agus cearta an duine i dtíortha faoi chuing na Sóivéadach, agus cosnaíonn siad iad i réimis fhorlámhacha i ndeisceart na hEorpa nó i ndeachtóireachtaí míleata i roinnt tíortha atá i mbéal forbartha.
Ag tús na 1960idí, ba í Parlaimint na hEorpa a chinntigh go mbeadh ráthú buncheart agus saoirsí bunúsacha agus urramú an daonlathais mar cheann de na coinníollacha do thíortha a bhí ag iarraidh dul isteach sa Chomhphobal Eorpach. Déanann sí a dícheall freisin cearta an duine a chosaint ina caidreamh le tríú tíortha, lena n-áirítear sa chaidreamh trádála.
Ar deireadh, bhunaigh an Pharlaimint Duais Sakharov um Shaoirse Smaointeoireachta in 1988. Gach bliain, in Strasbourg, bronntar an duais sin ar fhir agus ar mhná atá ag comhrac ar fud an domhain chun cearta an duine agus saoirsí bunúsacha a chosaint, go háirithe an tsaoirse chun tuairimí a nochtadh.
