Wirja
Insawru l-Ewropa
Niffaċċjaw l-isfidi flimkien: Il-perjodu 2010-2019
Negħlbu l-kriżijiet bħala Unjoni
L-UE kienet qed tiffaċċja sfidi ġodda li jvarjaw mill-kriżi finanzjarja għall-Brexit - il-votanti kif irreaġixxew?
2014: Din id-darba differenti: Aġixxi. Irreaġixxi. Ħalli Impatt.
Il-Kroazja eleġġiet il-MPE għall-ewwel darba, wara li ssieħbet fl-UE fl-2013.
Dawn kienu l-ewwel elezzjonijiet mindu daħal fis-seħħ it-Trattat ta’ Liżbona. Żvilupp ġdid għall-Parlament Ewropew kien il-proċess ta’ “Spitzenkandidaten” – il-grupp politiku li kien se jirċievi l-aktar voti kien se jagħżel il-President tal-Kummissjoni Ewropea. Peress li l-voti demokratiċi taċ-ċittadini Ewropej kien se jkollhom impatt fuq min kien se jsir il-President tal-Kummissjoni Ewropea, il-kandidati prinċipali tal-partiti politiċi ħadu sehem f’dibattiti fuq it-televiżjoni, f’intervisti, u f’manifestazzjonijiet biex jispiraw lill-votanti.
L-istaġnar ekonomiku laqat lill-Istati Membri. L-UE fittxet li tindirizza l-kriżi fil-pajjiżi midjuna biex tipproteġi l-istabbiltà tal-euro u tevita li ż-żona tal-euro tisfaxxa. Il-Kumitat Speċjali tal-Parlament Ewropew dwar il-Kriżi Finanzjarja, Ekonomika u Soċjali (CRIS) għamel rakkomandazzjonijiet dwar kif l-UE għandha tirrispondi għas-sitwazzjoni. Il-Parlament appoġġja l-ħolqien ta’ Inizjattiva favur l-Impjieg taż-Żgħażagħ, adottata fl-2013, biex tiġġieled kontra l-qgħad fost iż-żgħażagħ li jkunu jinsabu fir-reġjuni tal-UE l-aktar milquta.
Fl-2012, il-Parlament Ewropew qabel mal-kritiċi u ċaħad il-Ftehim Kummerċjali Kontra l-Falsifikazzjoni (ACTA); ftehim tant kontroversjali. Il-kritiċi kienu argumentaw li xi wħud mid-dispożizzjonijiet tal-ACTA dwar il-piraterija fuq l-Internet setgħu jipperikolaw il-libertajiet taċ-ċittadini.
Il-Parlament Ewropew u l-Parlament Ukren f’Kiev approvaw ftehim li kien jistabbilixxi assoċjazzjoni politika u integrazzjoni ekonomika bejn l-UE u l-Ukrajna. Fil-bqija tad-dinja, ir-Rebbiegħa Għarbija (2011) spiċċat fil-media Ewropea u bdiet il-gwerra ċivili fis-Sirja.